lubiam

LUBIAM

Quand seri pütlet vivevi in fond a vial Gorizia. A ghera sol soquante case e tut al rest l'era campagna; a ghera anca na stala e al fiol dal biolc al gneva a scöla con mi al Ippolito Nieve. Vers al cavalcavia a ghera anca na montagnina in doa andavam a sügar. An bel gioran é rivà di operai con di vagoncin e di binari. Ià comincià a scavar la montagnina e in poc temp il la lasada spianada compresa la stala e i gà semnà dal forment. Am ricordi parchè quand il l'à taià a son andà con le me sorele a spigolar propria in an gioran ca ghera l'eclipsi solar. L'an dopo però è comincià an gran moviment da operai, murador e geometri; a ghera anca an sior curios cal gneva tuti i gioran in bicicleta a vedar e dar la so opinion! Par forsa, dopo ema savì cl'era al sior Luigi Bianchi. Anca noaltar pütlet, dle volte, l'acompagnavam para curiosar e vedar dle atività che poche volte as vedeva a Mantova. Am piaseva vedar come con di maton picoi e an pò at cement i murador poc a poc i faseva an gran stabiliment. Al ültim intan chi fineva an camin ben alt è comincià a rivar tante machine rare; an bel gioran è comincià a rivar tante bele putele in bicicleta e la LUBIAM l'à comincià a dar da lavorar a tanta gent e a fabricar tanti bei vestì. Cal stabiliment par mi l'è sta al pricipio dal progreso e dal prestigio ad Mantova. La marca Lubiam las conos in tüt al mond. Mi, ades, quando vaghi dentar in an negozi at categoria, in America, am senti orgoglios da esar an mantovan, sa trovi an vestì LUBIAM. In cal stabiliment cò vist a cresar quand seri putlet ghè andà a laorar, dopo la guera, me sorela Edi e lag va ancora; dopo me sorele Vanda e Silvana le gà lavorà par diversi ani fin che iè andade in pension. Ades ac va anca na fiola dla Vanda, la Cristina. Mi am senti orgoglios, anca parchè la famiglia Forlin l'à contribuì al progreso da cla gran impresa dla elegansa dal bel vestir. La nostra famiglia l'è sempar stada ligada a la elegansa dal bel vestir; le nostre sie Noemi e Nella Forlin le gheva a Mantova la püsè prestigiosa sartoria da done. Anca da lor a g'andava tante bele putele a lavorar e a mi am piaseva andar a catar sü i spilin con la calamita sota i tavoi aprofitando par vedarag le gambe!L'unica diferensa fra me sie e la Lubiam l'era che una la faseva tut a man e l'altra quasi tut a machina e con la tecnologia püsè avansada. Me sie con vint putele le faseva tre vesti a la smana; la Lubiam con vint al na faseva sent. Quela l'è la diferensa dl'artigian al industrial. Anca al sior Luigi Bianchi l'era n'artigian prima, peró al gha avì l'üsta dal gran industrial e al coragio da far cla gran impresa. Se me sie Forlin le ghes avì la stesa inisiativa, ades a Mantova ac saria anca la "FORLIM".
An matoan in dal mond Giorgio Forlin
Lima-Peru 21 otobar 1999

Stampa la il testo