L’è vecia Mantoa di Romano Marradi

L’è vecia Mantoa
Testo di Romano Marradi -copyrigth-
Accademia Folenghiana di Mantova tel. 0376 322303
Studio via Certosini 3 -Mantova- cell. 0339 5830424

L’è vecia Mantoa, vecia tant ! Ma sì...
ché in di ani indré la stava chieta chi,
logada propria in mes ai so'caner
e sensa agitasion né gran penser;
e i citadin nostran i era sicür,
i andava foera 'd sera infina a scür:
s'a gh’era mia dle lampade s-ciasose
is contentava... sol con dle gasose.
Ché po anca alora a gneva tanta gent
a visitar in pace i so’ parent,
e acsì i pasava calmi, in armonia,
dle bele ortine, mama fioele e sia;
po i om i andava a spas par di stradei
content in compagnia di so' pütei,
o i sa slongava, a forsa da pedai,
in bici al Bosch Fontana, par chi viai.
Ma dopo è gnü 'l progreso: ades ocor
averagh l’automobile o 'l motor,
e 'l portafoi bel sgionf con dle palanche
binade con südor in tante banche;
le sponde a tach al lach i ha ben netade
par metaragh di indüstrie straminade,
e l’aria, ch'la savea mia tant ad san,
la par pü bona, propria par tüt l’an.
Ma ste mia credar che i l’imagines
acsì i Etrüschi, gnü sensa permes
guidà dla Maga Manto, 'n temp lontan...
ch'l'ea vist sicüra tera in dal pantan:
rivà dal Po e dal Mens in barchetina,
in teracrea i fasea dla roba fina.
E sensa andar a perdaras in di ani
dla storia, mia tant ciara, di Romani,
quand, dopo i Bonacolsi, è gnü i Gonsaga,
al lach i l’ha infiorà... fin sensa draga;
da star dla "Paleologa" i vardava
le feste "naumachie" ch’le sa slargava
tra di cürot polì, con tant da s-cias
in verte d’aqua, ciara tra i caplas.
L’è logica che ades, coi gran vantagi
ch’le dà le compagnie par mila viagi,
a vegna a Mantoa gent da tante bande,
infina di jovnot con le so' brande:
i varda le so' tor e i vicolin,
palas e cese scrite in s'i librin,
le strade vece, i mür e ‘po anca i fos,
che tant is derna ch’agh fa mal fin i os;
ma ste mia credar mai che, quand i va
insima ai torpedon e i torna a ca'
lor is ricorda sol, con dla pasion,
la storia dla cità, dl'evolusion:
parchè se ta gha d’mandi cosa i sa
con cle so’ tante foto ch'i ha scatà,
lor it dirà ben tüti: "ema magnà
chi mei che in chialtar sit ch’a sema 'ndà":
ch’l’è sta par lor sicüro 'n gran bel fat
l’aver slapà da güst i nostar piat,
fat sü par tradision da 'na "cosina"...
ch’lè poch ma l’è sicür... l’è genüina:
dal minestron al ris e salamele...
e da tortei e agnolin, da taiadele...
al nedar col pocin e al lüs in salsa...
che par tri dì pü i gh’ha avü fam in pansa.
Ché, vist Andrea Mantegna in dal Dücal
e ancora Sant’Andrea dal vec piasal,
i è 'ndà al Palas dal Te, cintà dal Parco,
e a vedar al mobilio 'd Carlo D’Arco;
e fin i ha portà via, ficà in dla testa,
che 'I gran Napoleon, rivà par festa,
in Piasa là 'd Sordelo - patatrach -
in s’i giaron al gh’ha picià 'I so' tach.
Ma forse mei i gh’avrà in dal so' sarvel
cle grose prede, in mes a tant sapel,
ch'i è stade etrüsche, mise a basament
dal campanil dal Dom, on sert moment.
Po certo, in dal discorar coi nostran,
i ha conosì 'l dialet di mantoan,
e i ha incontrà persone proprioa s-cete,
dle done bele e giovne cme pütlete;
gh’è dl’aria ch’la sa ancora 'd poesia,
ché chi in dal mantoan la taca mia
la smania da strafar e d’imbroiar
i poar forest, rivà par imparar.
L’è vecia Mantoa... e siora in dal parlar...
s’al poel ben dir, s’al poel anca sbraiar:
ché di om in gamba l’agh n’ha avü ogni dì,
da Virgili a Cocai, v’al dighi mi.
Acsì ai forest igh dis i mantoan,
e in dl’anima i saluta chi cristian
con tanta cortesia, col coer in man,
disendogh: "Va spetema chi anca dman"

Romano Marradi