La me Mantova
Ogi am son dismissià pensando a Mantova.
L'è, ca son dre contar i gioran cam manca par rivarac.
Risülta che al növ at Setembar ac sarà la riunion di Mantovan in dal mond organizada dal so president Daniele Marconcini. L'è
n'ocasion, che par fortuna, a voi mia perdar e a son dre a strolicar come faghi para rivarac in temp e azi conosar personalment a lü e a Pietro Liberati che par mi i ga al gran merit d'aver fat conosar la nostra organisasion a tüt al mond.
Andar a Mantova par mi l'è la püse bela sodisfasion dal mond ! In dla me vita a go avi l'ocasion da conosar tanti post, ma i cambiaria mia con la me Mantova anca sa faghi tanti lagrimon quand arivi e specialment quando parti.
Am pias rivarac in treno, come par sinc ani ac rivavi tuti i gioran quand' studiavi a Cremona. L'è bel anca rivarac in auto e vedar al cartel ca dis "MANTOVA CITTA D'ARTE" e tante targhe marcade MN.
Quand'son a Mantova e pasi per certi post mi am ringiovanisi e am par d'esar ancora an pütlet. Par esempi, caminar in Pradela, sota i portac, in piasa dle erbe o in riva al lac, l'è lo stes che sesanta ani fa. Le autorità le gà
l'merit da preservarla, a la me bela citá, come l'era in cal temp.
L'è dü ani cag vaghi mia, però par mi l'è tant. A gò al stes entusiasmo come la prima volta c'ha son tornà dopo ot ani.
A gò voia da vedar la me bela cità, da vedar come l'ha progresà, da vedar al me bel lac, da far an gir in batel, e da sentar parlar an po al mantoan che posi mia dimenticar, anca sal scrivi mal !
A gò voia da vedar i me parent, i me amic, da magnar i trigoi, le chisoline, al risot con le salamele, i tortei, e anca da ciapar an qual becon da na sansala mantoana !
Giorgio Forlin
an mantoan in dal mond
Lima, 5 agost dal 2000
Giorgio Forlin
Mantovaninelmondo© 1999-2002
All rights reserved
liberatiarts©Mantova Italy